बागलुङ, १५ भदौ– जिल्लाको जैमिनी नगरपालिका–७ की हरीकला राना बिहिबार जनैपूर्णिमाको दिन उत्तरगंगा ढोरबराह मन्दिर पुगिन् । उनी त्यहाँ पुग्दा बिहानैदेखि दर्शनार्थीको घुइँचो लागेको थियो । ढोरपाटन नगरपालिकाको मुकाम बुर्तिबाङ बजारदेखि ३२ किलोमिटर दुरीमा रहेको मन्दिर पुग्दा दर्शनार्थीमा जुन उत्साह थियो त्योभन्दा ठुलो पीडा उनीहरुले सडकमा व्यहोरे ।
‘सडक हिँडिनसक्नु भाडा तिरिनसक्नु, कठिनले मेलामा आईयो’ रानाले भनिन् ‘मेलास्थल पुगेपछि भने हजारौंको भीडले रमाईलो भयो ।’ ऐतिहासिक महत्वको प्रसिद्ध धार्मिकस्थल उत्तरगंगा ढोरबराहमा हरेक वर्ष जनैपूर्णिमा र वैशाख पूर्णिमामा मेला लाग्ने गर्छ ।
ढोरपाटन नगरपालिका–९ ढोरपाटन उपत्यकामा अवस्थित मन्दिरमा पूजाआजा गर्दा मनोकांक्षा पूरा हुने जनविश्वास छ । राष्ट्रिय गौरवको आयोजना ढोरपाटन सालझण्डी आयोजनाले समयमा काम नसक्दा यहाँ हरेक बर्ष दर्शनार्थीले दुख पाउने गरेका छन् । ढोरपाटन नगरपालिकाले सडक सफा गरेर मात्रै सवारी चलाउने गरेको छ ।
‘भेडाको बली चड्ने रहेछ, सयौं भेडाहरुको बली दिएको देखियो’ रानाले भनिन् ‘कयौं भाकलहरु पुरा हुने विश्वासले यहाँ आउने रहेछन् ।’ केही वर्षअघिसम्म जनैपूर्णिमामा मात्रै यहाँ मेला लाग्ने र पूजाआजा गर्ने चलन थियो । पछिल्लो समय टाढाबाट भाकल गरी आउने दर्शनार्थीलाई एकै दिनमात्रै पुजा हुँदा कठिन हुने गरेको भन्दै बैशाख पूर्णिमा पनि पूजा गर्न थालिएको स्थानीय कुलबहादुर घर्तीमगरले बताए ।
पहिले जनैपूर्णिमाका दिन हजारौँ बोका, पाठा र भेडाको बलि दिइने गरेपनि पछिल्लो समय त्यो बाँडिएको छ । बैशाखमा पनि उत्तिकै दर्शनार्थी आउने भएकाले जनैपूर्णिमामा लाग्ने भीड कम भएको स्थानीय बताउँछन् । बर्खाको हिलो, बुर्तिबाङबाट आउने सडक पनि अप्ठ्यारो हुँदा दर्शनार्थीले दुःख पाउने गरेका छन् । सडक नहुँदाको समयमा भाकल गरेका बोकापाठा ल्याउन गाह्रो भएपनि पछिल्लो समय सडक सहज भएको स्थानीय बताउँछन् ।
भक्तजनको सजिलोका लागि ढोरपाटन नगरपालिकाले ठाउँ ठाउँमा डोजर राखेर सडक मर्मत गरिरहेको छ । वर्षाले सडकका विभिन्न स्थानमा क्षति पु¥याएकाले मर्मत गरिएको ढोरपाटन नगरपालिकाका उपप्रमुख धनबहादुर कायतले जानकारी दिए । मेलामा स्थानीय क्लबले विभिन्न खेलकुद तथा सांस्कृतिक कार्यक्रम पनि आयोजना गरेका छन् ।
