प्रतिकात्मक तस्बिर
बागलुङ, ३० भदौ– ढोरपाटन नगरपालिका–४ की तारा श्रेष्ठले एक बिदेशी नागरिकको नाम रहेको फेसबुकमा साथी भइन् । त्यसपछि उनलाई नेपाली नाम भएको अनिता शर्मासँग परिचय गराइयो ।
डेस्मण्ड हेनरी भन्ने व्यक्तिमार्फत अनिताले अमेरिका आएको म्यासेज लेखिन् । यतिन्जेलसम्म श्रेष्ठलाई अमेरिका आउने भए रिकोना इन्टरनेशनल भन्ने संस्थाको खातामा पैसा जम्मा गर्न भनियो । उक्त कुरा सुनेर मख्ख भएकी ताराले ७ लाख रुपैयाँ खातामा राखिदिइन् ।
अमेरिका जाने सपनामा यसरी निरन्तर पैसा थप्दै गएकी तारा अहिले अलपत्र अबस्थामा छिन् । बैदेशिक रोजगारीमा जानुपर्नेले सुरक्षित रुपमा र थाहा पाएर मात्र पैसा दिनुपर्नेमा जथाभावी रकम दिंदा उनी अलपत्र परेकी हुन् । अहिले उनको साथबाट पैसा लैजानेहरु सम्पर्कमा छैनन् । खोजी गर्ने आधार नभएर उनी चिन्तामा छिन् । श्रीमानलाई जानकारी नदिइ लाखौं रकम जम्मा गर्दा उनको पैसा पनि गुम्यो, परिवारमा सम्बन्धसमेत बिग्रिएको छ ।
समस्यामा परेपछि मात्र उनी जिल्ला प्रशासन, प्रहरी र सुरक्षित आप्रवासन कार्यक्रमको आप्रवासी श्रोत केन्द्रमा पुगेकी छिन् । उनले दिएको रकमको न भौचर छ, न त कुनै आधिकारिक संस्था । फरक फरक समय र फरक व्यक्तिको नाउँमा ऋण तिरेझै रकम बुझाउँदा उनी ठगिएको हो वा होइन भन्ने बुझ्न समय लागेको सुरक्षित आप्रवासन कार्यक्रम बागलुङका प्रमुख मीनप्रसाद उपाध्यायले बताए । उपाध्यायका अनुसार ताराजस्ता दर्जनबढी घटनामा चिन्दै नचिनेको मानिसलाई दिएर लाखौं रकम गुमाएकाहरु बढेका छन् ।
पछिल्लो समय अमेरिका, क्यानडा वा अन्य युरोपका देशमा जाने भन्दै लाखौं रुपैयाँ ठगिएकाहरु केन्द्रमा गुनासो लिएर आउने गरेका छन् । कतिपयले प्रमाणसहित ल्याएकोले रकम फिर्ता गराउन सहज भएको छ भने अधिकांसले व्यक्तिगत रुपमा लेनदेन गर्दा समस्यामा परेकाहरु धेरै भएको पाइएको छ । बैदेशिक रोजगारीलाई सुरक्षित र भरपर्दो बनाउने अभियानमा केन्द्रले सहजीकरण गर्दै आएको छ ।
शुरुमा कुरा छलेकाहरु नै पछि ठगिएर आउने गरेको भेटिएको हो । साथै गैरकानुनी रुपमा बिदेश जान खोज्ने, श्रम स्विकृति नै नभएको देशमा जाने र जथाभावी रकम बुझाउने प्रवृत्तिले धेरै ठगिएका हुन् । कतिपय देशमा जानका लागि १० हजार मात्रै रकम लाग्नेमा १ लाखदेखि ४ लाखसम्म बुझाउने गरेको भेटिएको छ ।
