बागलुङ, ३ फागुन– जिल्लामा त्रिदिवसीय कार्यक्रमका साथ राष्ट्रिय प्रजातन्त्र दिवस मनाइने भएको छ ।
जिल्ला समन्वय समिति बागलुङका प्रमुख अमरबहादुर थापाको अध्यक्षतामा बसेको सरोकारवालाहरुको बैठकले फागुन ६, ७ र ८ गते त्रिदिवसीय बिभिन्न कार्यक्रमका साथ राष्ट्रिय प्रजातन्त्र दिवस मनाउने निर्णय गरेको हो ।
समन्वय प्रमुख थापाको संयोजकत्वमा सरोकारवालाहरुको प्रतिनिधीत्व रहने गरि राष्ट्रिय प्रजातन्त्र दिवस २०८० मुल समारोह समिति गठन गर्दै फागुन ६, ७ र ८ गते त्रिदिवसीय बिभिन्न कार्यक्रमका साथ दिवस मनाउने निर्णय गरेको समन्व्य समितिका सुचना अधिकारी दुर्गाप्रसाद शर्माले जानकारी दिए ।
फागुन ६, ७ र ८ गते तीन दिनसम्म नै जिल्ला स्थित सम्पूर्ण सरकारी निकाय, प्रतिष्ठान तथा संघसंस्थाको कार्यालयहरुको छत, बरन्डा र परिसरमा निर्धारित साइजका राष्ट्रिय झण्डा मर्यादा पूर्वक राखि सजाउने र साँझ सम्पूर्ण कार्यालयहरु तथा जिल्लावासीका घरघरमा दिपावली गर्ने निर्णय भएको छ ।
मुख्य दिन फागुन ७ गते बिहान साढे ७ बजे राजनैतिक दल, राष्ट्र सेवक कर्मचारीहरु, सुरक्षाकर्मी, शिक्षक, बिद्यार्थी, पत्रकार, खेलाडि, गैरसरकारी संघसंस्थाका प्रतिनिधी लगाएत आम नागरिकको सहभागीतामा व्यानर र राष्ट्रिय झण्डा सहित समिक्षालय चोकमा जम्मा भई प्रभातफेरी गरि लोकतान्त्रिकचोकमा मुल समारोह गर्ने निर्णय भएको समन्वय प्रमुख थापाले बताए ।
त्यसैगरि फागुन ८ गते स्वास्थ्य कार्यालयले नसर्ने रोगको स्क्रिन कार्यक्रम सहित सचेतनामुलक कार्यक्रम गर्ने, दिवसको महत्वका बिषयमा पत्रकार महासंघको समन्वयमा जिङ्गल बनाई प्रचारप्रसार गर्ने, एफ.एम. रेडियोमा परिसम्वाद कार्यक्रम संचालन गर्ने र बागलुङ नगरपालिकाको समन्वयमा माइक, राष्ट्रिय झण्डा, फुलमाला, व्यानर, चियापान, जिङ्गलसहित आवश्यक तयारी र व्यवस्थापन गर्ने निर्णय भएको सुचना अधिकारी शर्माले जानकारी दिए ।
