बागलुङ, २७ असोज– आगामी मंसिर ४ गते हुने प्रतिनिधिसभा तथा प्रदेशसभा निर्वाचनका लागि निर्वाचन अधिकृतको कार्यालयहरुले उमेद्वारहरुलाई चुनाव चिन्ह प्रदान गरेका छन् । बागलुङका दुईवटै प्रतिनिधिसभा र चारवटै प्रदेशसभामा उमेद्वारी दिएका दलका उमेद्वारहरुले दलको चिन्ह र स्वतन्त्र उमेद्वारहरुले अन्य चिन्ह पाएका छन् ।
बागलुङ क्षेत्र नं. २ मा स्वतन्त्र उमेद्वारी दिएका तुलसीराम अर्यालले सूर्यमुखी फुल पाएका छन् । अर्का स्वतन्त्र उमेद्वार डिलबहादुर कार्कीले पुतली चिन्ह पाएका छन् ।
बागलुङ क्षेत्र नं. २ प्रदेशसभा ‘क’मा स्वतन्त्र उमेद्वारी दिएका प्रकाश घर्ती मगरले लालटिन चिन्ह पाएका छन् ।
सत्ता गठबन्धनको तर्फबाट उमेद्वार रहेका नेपाली कांग्रेस बागलुङका सभापति जीत शेरचनका उनी एकल प्रतिस्पर्धि हुन् । घर्तीलाई एमालेको समर्थन रहेको छ । यहाँ शेरचन र घर्ती मात्रै प्रदेशसभाको उमेद्वार छन् । उनी गत स्थानीय तह निर्वाचनमा पनि ताराखोला गाउँपालिकामा स्वतन्त्र उमेद्वार थिए । स्थानीय तहमा घर्तीले पुतली चिन्ह लिएर उपविजेता बनेका थिए ।
बागलुङ क्षेत्र नं. २ प्रदेशसभा ‘ख’मा स्वतन्त्र उमेद्वारी दिएकी दुर्गादेवी घर्तीले जेब्रा चिन्ह पाएकी छन्भने अर्का स्वतन्त्र उमेद्वार नरबहादुर गुरुङले बिजुलीको चीम चिन्ह पाएका छन् । बागलुङ क्षेत्र नं. १ मा स्वतन्त्र उमेद्वारी दिएका चन्द्र बहादुर क्षेत्रीले मुढा चिन्ह पाएका छन् ।
बागलुङ क्षेत्र नं. १ को प्रदेशसभा ‘क’मा स्वतन्त्र उमेद्वारी दिएका दिपेन्द्र हमालले उडिरहेको चील चुनाव चिन्ह पाएका छन् । निर्वाचन अधिकृतको कार्यालयले बुधबार उनीहरुलाई चुनाव चिन्ह प्रदान गरेको हो ।
