बागलुङ, १८ मंसिर– राष्ट्रिय उपभोक्ता मञ्च बागलुङको ७ औं साधारणसभा तथा अधिवेसन शनिबार सम्पन्न भएको छ । अधिवेशनले शैलेन्द्र कुमार श्रेष्ठको अध्यक्षतामा ११ सदस्यीय कार्यसमिति निर्विरोध चयन गरेको छ ।
मञ्चको उपाध्यक्षमा गोबिन्द गौतम, सचिवमा मनमाया श्रेष्ठ, कोषाध्यक्ष युक्तजंग राजभण्डारी, सहसचिवमा धनकुमारी गौचन, सदस्यहरुमा जयलाल सापकोटा, भिमसेन थापा, मञ्जु क्षेत्री, भक्तबहादुर बिक, रामबहादुर केसी, ताराकान्त आचार्य र हरिप्रसाद सापकोटा चयन भएका छन् ।
साधारणसभामा बोल्दै उद्योग बाणिज्य संघ बागलुङका अध्यक्ष नरेश कंडेल, बागलुङ नगरपालिकाका पूर्वप्रमुख जनकराज पौडेलले उपभोक्ताको हक हितमा काम गर्न मञ्चको सक्रियता सहयोगी भएको बताएका थिए । आम नागरिकले स्वच्छ पानी पाउनुपर्नेदेखि खाद्य अधिकार रक्षाका लागि मञ्चले उठाएका बिषयमा राज्यका निकाय गम्भिर बन्नुपर्ने समेत उनीहरुको धारणा थियो ।
मञ्चले चाडपर्व लक्षित बजार अनुगमन, अखाद्य बस्तुको मिसावट भएको जानकारी पाएमा सुक्ष्म अध्ययन र अनुगमन गर्ने तथा आम नागरिकको स्वास्थ्य र अन्य अधिकारका बिषयमा पनि जानकारी लिने र सेवाप्रवाहलाई चुस्त बनाउने अभियानमा काम गर्दै आएको छ ।
