बागलुङ, ३ पुस–सुरक्षित आप्रवासी श्रमिक दिवशको अवसरमा वैदेशिक रोजगारीमा जाने तयारी गरेकाहरुलाई परामर्श तथा सम्मान गरिएको छ ।
बागलुङ नगरपालिकाद्वरा संचालित सुरक्षित आप्रवासन कार्यक्रम सामी परियोजनाले आइतबार जिल्ला प्रशासन कार्यालयमा पहिलो सेवाग्राहीको रुपमा आउनुभएका अमलाचौरका बिनोद पौडेल, छिस्तीका हिमाल शर्मा र बागलुङ नगरपालिका वडा नं. ७ का किस्मत गैरेलाई परामर्शसंगै दोसल्ला ओढाएर सम्मान गरेको हो ।
सो अबसरमा परियोजनाका कार्यक्रम संयोजक मीनप्रसाद उपाध्यायले बैदेशिक रोजगारीमा आउनसक्ने समस्या, समस्याबाट छुटकारा पाउन गर्नुपर्ने काम, तयारी र समस्या आएमा परियोजनाले दिने सेवाबारे सेवाग्राहीलाई परामर्श दिएका थिए ।
सेवाग्राहीलाई सम्मान गर्दै प्रमुख जिल्ला अधिकारी रमेश ढकालले बैदेशिक रोजगारी नेपालीको बाध्यता भएको भन्दै बिदेशमा सुरक्षा पाउने अधिकारका लागि परियोजना र प्रशासनले सहयोग गर्ने बताए । उनले सकेसम्म विदेश नजान र जानैपरेमा सीप सिकेर मात्रै जान आग्रह गरेका थिए ।
चार बर्ष अघिदेखि बागलुङ, जैमिनी, गलकोट नगरपालिका र काठेखोला गाउँपालिकामा सामी परियोजना संचालनमा छ । कार्यक्रम संयोजक उपाध्यायका अनुसार चार बर्षमा ११ हजार आप्रवासीको पक्षमा काम भैसकेको छ ।
