मुस्ताङ, ७ पुस– जिल्लामा दुई महिनाका लागि विद्यालय बन्द भएका छन् । अत्याधिक चिसोसँगै सम्भावित हिमपातले जनजीवन कष्टकर हुने भएकाले मुस्ताङका शैक्षिक संस्थाहरूलाई पुसको पहिलो हप्तादेखि हिउँदे बिदा दिइएको हो ।
मुस्ताङका ३४ सामुदायिक विद्यालयमध्ये लोमान्थाङ गाउँपालिका–३ लोघेकर दामोदरकुण्डको ७ र वारागुङ मुक्तिक्षेत्रका दुई गरी कुल १२ वटा विद्यालय घुम्ती कक्षाका लागि पोखरा स्थान्तरण गरिसकिएको छ ।
यसबाहेक २२ वटा सामुदायिक विद्यालयलाई सम्बन्धित शिक्षा शाखाको समन्वयमा पुसको पहिलो हप्तादेखि २ महिना लामो हिउँदे बिदा दिएर शैक्षिक पठनपाठन पूर्ण रूपमा बन्द गरिएको शिक्षा विकास तथा समन्वय इकाई मुस्ताङका सूचना अधिकारी चन्द्रसिंह विकले जानकारी दिए ।
विकका अनुसार घुम्ती कक्षाका लागि झरेका विद्यालयबाहेक अन्य विद्यालयहरूले चालु वर्षको वार्षिक परीक्षा सकेका छन् । उनीहरूलाई परीक्षा सकेर हिउँदे बिदा दिइएको हो । सामुदायिक विद्यालयमा ३ हजार ८ सय ७५ जना विद्यार्थी छन् ।
लोमान्थाङको राष्ट्रिय आविलाई पोखरा किमबेसी, दिव्यदीप माविलाई पोखरा विजयपुर र जिन्जु आवि छोन्हुपलाई पोखरा हेम्जामा स्थान्तरण गरिएको हो । चिसोका कारण बेसी झरेका विद्यालयका वार्षिक परीक्षा चैत्र महिनामा हुने र नयाँ शत्रको पढाइका लागि बैशाख महिनामा लेक उक्लिने प्रचलन छ ।
