म्याग्दी, १२ असोज– जिल्लाको अन्नपूर्ण गाउँपालिका–२ भूरुङतातोपानीदेखि अन्नपूर्ण गाउँपालिका वडा नं. ६ पाउद्वारको तातोपानीकुण्ड जानका लागि कालीगण्डकी नदीमा स्थायी पुल नहुँदा अस्थायी काठेपुलको प्रयोग गर्नुपर्ने बाध्यता छ ।
बेनी–जोमसोम–कोरला सडकखण्डअन्तर्गत पर्ने यो सडकखण्डमा हिँउदमा मात्रै प्रयोग गर्न मिल्ने काठेपुल स्थानीय एक युवाले व्यक्तिगत लगानीमा निर्माण गरेका छन् । संघ, प्रदेश र स्थानीय सरकारले पुल निर्माणमा चासो नदेखाएपछि स्थानीय कुमार तिलिजाले एक लाख लगानी गरी काठेपुल निर्माण गरेको बताए ।
स्थानीय प्रविधिको प्रयोग गरी निर्माण गरिएको काठेपुल हिउँदको समयमा मात्र प्रयोग गरिन्छ । बर्खामा कालीगण्डकी नदीमा पानीको बहाव उच्च हुने भएकाले तातोपानी कुण्डमा जाने बिरामी र पर्यटक नारच्याङको बाटो हुँदै पाउद्वार तातोपानी कुण्डमा पुग्नुपर्ने बाध्यता छ ।
पुल नहुँदा नारच्याङ पुगेर करिब एक घण्टाको घुमाउरो बाटो हिँड्नुपर्ने बाध्यता हटाउन कालीगण्डकीमा अस्थायी पुल निर्माण गरिएको तिलिजाले बताए । स्थानीयले हिउँद यामका लागि मात्रै अस्थायी काठको पुल बनाउने गर्दछन् ।
पुल बनाउने खर्च गाउँपालिकाले दिने आश्वासन दिए पनि अहिलेसम्म नपाएको तिजिलाको भनाई छ । पूर्वाधार विकास कार्यालय म्याग्दीले भने उक्त स्थानमा पुल बनाउन योजना छनोट भएको र कार्यान्वयनको चरणमा रहेको जनाएको छ ।
