बागलुङ, २६ पुस– जगतगुरुतम दिवशको अबसरमा राधामाधम सेवा समिति बागलुङले दुर्गम तमानखोला गाउँपालिकाले संचालन गरेको बालगृहका बालबालिकाललाई न्यानो कपडा वितरण गरेको छ ।
कार्यक्रममा गाउँपालिका अध्यक्ष जोकलाल बुढाले बालबालिकालाई कपडा हस्तान्तरण गरेका थिए । उक्त अवसरमा बुढाले दाताको साथ र सहयोगमा चलेको बालगृहको संरक्षण र अनाथ बालबालिकाको पढाइ तथा खानेबस्ने व्यवस्थापनमा गाउँपालिकाले साथ दिने बताए ।
कार्यक्रममा समितिका सचिव दिपकप्रसाद शर्मा कंडेलले संस्थाको दिवश पारेर बालबालिकाको हातमा न्यानो कपडा दिन पाएकोमा खुसी व्यक्त गरे । निस्वार्थ रुपमा बालबालिकालाई थप सहयोग गर्ने पनि उनले प्रतिवद्धता जनाए । बालगृहमा रहेका ३१ बालबालिकालाई सुइटर, टोपी र शैक्षिक सामाग्री पनि प्रदान गरिएको थियो ।
गाउँपालिका अध्यक्ष जोकलाल बुढा सहितका जनप्रतिनिधिले पहिलो कार्यकालमा तलबको ५ प्रतिशत रकम कटाएर चलाएको कोषबाट १० लाख र गाउँपालिकाको ७ लाख गरी १७ लाख लागतमा बालगृह संचालनमा आएको हो ।
कार्यक्रममा धनगौज्योती माबिका प्रअ रबिन्द्र बुढाथोकी, वडा नं. ३ का कावा अध्यक्ष गोर्खबहादुर घर्ती, बालगृह संचालक समितिका सचिव अनिल थापा, कार्यपालिका सदसय मनकुमारी बुढाथोकी लगायतले बोलेका थिए । राधामाधम सेवा समितिका सचिव दिपक प्रसाद कंडेलको अध्यक्षतामा कार्यक्रम सम्पन्न भएको थियो ।
