बागलुङ, १४ माघ– जिल्लामा आगामी माघ १५ गतेदेखि सात दिने नृत्य कार्यशाला सञ्चालन हुने भएको छ । विद्यार्थीहरुमा नृत्य सम्बन्धि सैद्धान्तिक र व्यवहारिक ज्ञान दिनका लागि कार्याशाला आयोजना गरिएको हो ।
जुनतारा मिडिया हाउस बागलुङको आयोजनामा सञ्चालन हुने कार्याशालामा जिल्लाभरबाट नृत्यको सैद्धान्तिक ज्ञान लिन चाहने विद्यार्थीहरु सहभागि हुन सक्ने छन् । कार्यशालामा मौलिक तथा शास्त्रीय नृत्य सम्बन्धि सैद्धान्तिक र व्यवहारिक ज्ञान दिईने आयोजक दिलिप कँडेलले जानकारी दिए ।
‘बिद्यार्थीहरु नृत्यमा आकर्षित छन् तर धेरैलाई यसको सैद्धान्तिक पाटोको बिषयमा जानकारी छैन्’ कँडेलले भने ‘हामीले निशुल्क रुपमा कार्यशाला आयोजना गरेर मौलिक र शास्त्रीय नृत्यको प्रबद्र्धन गर्न लागिरहेका छौं ।’
कार्यशालाको बिषयमा शुक्रबार आयोजकले पत्रकार भेटघाट गरेर जानकारी गराएको थियो । कार्यशालामा विद्यार्थीलाई सहभागिताको लागि विद्यालयलाई पत्राचार गरिएको छ । कार्यशालामा नृत्य प्रशिक्षक महेश गोदारले सहजिकरण गर्ने छन् । विद्यार्थीको पठनपाठन प्रभावित नहुने गरी बिहान वा बेलुकाको समयमा कार्यशाला सञ्चालन हुनेछ ।
