बागलुङ, १७ माघ– जिल्लाबाट यस वर्षको माध्यमिक शिक्षा परीक्षा (एसइई) मा चार हजार आठ सय ३६ विद्यार्थी सहभागी हुने छन् ।
कक्षा १० को पठन पाठनमा परीक्षाका लागि आवश्यक हाजिरी पु¥याएका नियमिततर्फ चार हजार ५ सय ४४, ग्रेडवृद्धिमा ६२ जना र प्राविधिक धारका २ सय ३० विद्यार्थी परीक्षाका लागि योग्य भएका हुन् । परीक्षामा सहभागी हुन विद्यालय सञ्चालन हुने दिनको न्यूनतम ७० प्रतिशत हाजिरी हुनुपर्ने प्रावधान रहेको छ ।
शिक्षा विकास तथा समन्वय इकाई बागलुङका प्रमुख कुश्मराज उपाध्याका अनुसार धौलागिरी बहिरा आवासिय मावि र शान्ति मावि कुश्मिसेरामा कम्प्युटर इन्जिनियर, धौलागिरी विरेन्द्र माविमा भेटेनरी, भिमसेन मावि विहुँमा सिभिल इन्जिनियरिङ्ग, गल्कोट मावि र त्रिभुवन माविमा कृषि विषयको पठन पाठन भइरहेको छ ।
जिल्लाको ६ वटा माध्यमिक विद्यालयले मात्रा कक्षा ९ र १० मा प्राविधिक सञ्चालन गर्दा प्राविधिकतर्फ विद्यार्थी संख्या न्यून रहेको उपाध्याको भनाइ छ । बागलुङमा सामुदायिक विद्यालयले मात्रा कक्षा ९ र १० मा प्राविधिक विषयमा पठन पाठन गर्दै आएका छन् ।
यस जनताधन माध्यमिक विद्यालयबाट तीन जना दृष्टिविहिन र धौलागिरि बहिरा विद्यालयबाट १८ जना बाहिरा विद्यार्थी परीक्षामा सहभागी हुने शिक्षा विकास तथा समन्वय एकाईका शाखा अधिकृत विदुर शर्मा चापागाईले जानकारी दिए ।
परीक्षा सञ्चालनको लागि गत वर्ष ३१ वटा केन्द्र निर्माण गरिएको थियो । यो वर्ष पनि त्यही सङ्ख्यामा परीक्षा कायम रहने छ । राष्ट्रिय परीक्षा बोर्डले एसईई परीक्षा चैत्र १७ गतेदेखि २९ गतेसम्म विहान ८ बजेदेखि ११ बजेसम्म परीक्षा सञ्चालन गर्ने परीक्षा तालिका सार्वजनिक गरेको छ ।
