बागलुङ, २२ माघ– प्रेस चौतारी क्रियाशिल पत्रकारिता पुरस्कारबाट बागलुङका तीन जना पत्रकार पुरस्कृत भएका छन् । प्रेस चौतारी नेपालको २५ औँ स्थापना दिवसको अवसरमा आइतबार प्रेस चौतारी बागलुङ शाखाले पत्रकारत्रयलाई पुरस्कत गरेको हो ।
२०७७ सालको प्रेस चौतारी क्रियाशिल पत्रकारिता पुरस्कारबाट पत्रकार महासंघका निवर्तमान अध्यक्ष दिल शिरिष, २०७८ सालको पुरस्कारबाट जननिगरानी साप्ताहिकका खिमबहादुर कार्की र २०७९ सालको पुरस्कारबाट धौलागिरि एफएमका स्टेशन प्रमुख तथा प्रेस चौतारी गण्डकी प्रदेश उपाध्यक्ष उमाकान्त शर्मालाई पुरस्कृत गरिएको हो ।
पुरस्कृत तीनै जना पत्रकारलाई जनही नगद १० हजारसहित दोसल्ला ओढाएर सम्मान गरिएको प्रेस चौतारी नेपाल बागलुङ शाखाका सचिव कमल पौडेलले जानकारी दिए ।
पुरस्कृत पत्रकारहरुलाई नेकपा एमालेका पोलिटव्युरो सदस्य तथा गण्डकी प्रदेशसभा सदस्य लिलाबहादुर थापा, एमालेका केन्द्रिय सदस्य एवँ गण्डकी प्रदेशसभा सदस्य गोविन्द नेपाली लगाएतले सम्मान गरेका थिए । सो अवसरमा प्रेस चौतारी नेपाल जिल्ला शाखा बागलुङले १ लाखको युवा पत्रकारिता पुरस्कारको घोषणा पनि गरेको थियो ।
सो अवसरमा बोल्दै पोलिटव्युरो सदस्य थापा र केन्द्रिय सदस्य नेपालीले पत्रकारिताको हितमा ऐन र कानुन बनाउन प्रतिवद्ध रहेको धारणा व्यक्त गरेका थिए ।
