काठमाडौं, २६ माघ– नेपाली महिला फुटबल टोली साफ महिला फुटबलमा पहिलो उपाधि जित्ने मौकाबाट फेरि चुकेको छ । बंगलादेशमा जारी साफ यू–२० महिला च्याम्पियनसिपको फाइनलमा बिहीबार साँझ घरेलु टोलीसँग भिडेको नेपाल ३–० गोलले पराजित भयो ।
पहिलो हाफको अन्त्यतिर दुई गोल गर्दै बंगलादेशले नेपालमाथि दबाब बनाएको थियो । घरेलु टोलीले ४१ र पहिलो हाफको इन्जुरी समयमा गोल गरेको थियो । तेस्रो गोल ८६ औँ मिनेटमा गरेको हो । नेपालले साफ महिला फुटबलको कुनैपनि स्तरको प्रतियोगिता हालसम्म जित्न सकेको छैन ।
सिनियर साफ महिला च्याम्पिनयसिपका सबै ६ संस्करणमध्ये पाँचवटामा फाइनलमा पराजित भएको थियो भने दक्षिण एसियाली–सागअन्तर्गत महिला फुटबलका सबै तीन संस्करणमा उपविजेतामा सिमित भएको थियो । उमेरस्तरतर्फ सन् २०१८ मा आयोजना भएको पहिलो साफ यू–१८ महिला च्याम्पियनसिपमा फाइनलसम्म पुगेपनि बंगलादेशले उपाधि जित्नबाट रोकेको थियो ।
