बागलुङ, ४ फागुन– कालीगण्डकी नदी किनारका बस्ती जोखिममा परेपछि तटबन्ध निर्माण गर्न थालिएको छ । पर्वतको मालढुंगास्थित पक्की पुल क्षेत्रमा नदी कटानले बस्ती जोगिममा परेपछि जलस्रोत तथा सिँचाइ डिभिजन कार्यालय बागलुङले तटबन्ध निर्माण थालेको हो ।
चालु आर्थिक वर्षमा मालढुंगाको तटीय बस्ती, मालढुंगा प्रहरी चौकी, मन्दिरलगायत संरचना जोगाउन ९० लाख विनियोजन गरिएको छ । ६५ लाख खर्च गरी पक्की पर्खाल निर्माण गरिएको जलस्रोत तथा सिँचाइ डिभिजन कार्यालयका निमित्त डिभिजन प्रमुख झलकमोहन ओझाले जानकारी दिए ।
‘जिल्लामा संघीय आयोजनामार्फत १४ र गण्डकी प्रदेश सरकार अन्तर्गतका २० योजना सञ्चालित छन्’, ओझाले भने । कालीगण्डकी नदी, काठेखोला, निसीखोला, बडिगाड, दरमखोला र गौदीखोलालगायतका नदीमा तटबन्ध गरिँदै आईएको छ ।
कालीगण्डकी नदीमाथि निर्माण भएको पुलसमेत कटानले जोखिममा परेपछि सडक डिभिजन कार्यालयले सो क्षेत्रमा पर्खाल निर्माण गरेको छ । चालु वर्षमा संघ र प्रदेशका ४३ नदी नियन्त्रणका योजनामध्ये २० भन्दा बढीको काम सम्पन्न भइसकेका छन् ।
चालु आर्थिक वर्षमा नदी नियन्त्रणका लागि संघीय सरकारले दुई करोड ५० लाख र गण्डकी प्रदेश सरकारले दुई करोड ४७ लाख विनियोजन गरेको छ ।
