म्याग्दी, ५ फागुन– पर्वतको जलजला गाउँपालिकाले ६ वटा वडा कार्यालय भवन निर्माण सुरु गरेको छ । संघीय सरकारसँगको लागत साझेदारीमा वडा कार्यालयको भवन निर्माण सुरु भएको हो ।
जलजालका बाँसखर्क,, फट्केढुंगा, लेकफाँट, शालिजा, धाइरिङ र बनौको भवन निर्माण सुरु भएको गाउँपालिकाका इञ्जिनीयर सुनिल बानियाँले जानकारी दिए । एक तला र चार कोठा हुने भवनको काम चालु आर्थिक वर्षभित्रमै सम्पन्न गर्ने लक्ष्य रहेको छ ।
कूल ४ करोड ३३ लाख १७ हजार रुपैयाँ लागत अनुमान गरिएको भवन निर्माणका लागि जयलक्ष्मी–अभिनव जेभी बागलुङले तीन करोड २६ लाख सात हजार पाँच सय ५१ रुपैयाँमा ठेक्का सम्झौता गरेको छ । २०७९ पुस १२ गते ठेक्का सम्झौता भएको भवन निर्माणकार्य २०८० असार ३० मा सम्पन्न गर्ने लक्ष्य रहेको छ ।
गाउँपालिकाका कार्यबाहक अध्यक्ष दीपक आचार्यले निर्माण कम्पनीले निर्माणस्थलमा जग्गा सम्याएर संरचना बनाउन थालेको बताए । ‘गतवर्ष सुरु भएको वडा नं २ र ८ को भवन निर्माण यसैवर्ष सकिँदैछ, वडा नं ३ को आफ्नै भवन छ’ आचार्यले भने, ‘६ नयाँ भवन बनेपछि हाम्रो पालिकाको नौ वटै वडा आफ्नै भवनबाट सञ्चालन हुनेछन् ।’
नयाँ भवनमा वडाध्यक्ष, सचिव, जनप्रतिनिधिको कार्यकक्ष र सभाहल हुनेछन् । गत माघ ४ गते भएको १३ औँ गाउँसभाले लामाखेतमा गाउँपालिकाको कार्यालय सञ्चालनका लागि अस्थायी संरचना बनाउन तीस लाख बजेट विनियोजन गर्दै जग्गा अध्ययनसम्बन्धी कार्यदल समेत गठन गरिसकेको छ ।
