बागलुङ, ९ फागुन– बागलुङ नगरपालिकाको आयोजनामा जारी राष्ट्रपति रनिङ शिल्ड प्रतियोगितामा छात्रा तर्फको लामो दुरीका दौडमा बिद्यामन्दिर माबिकी ज्ञानदेवी रोकाले जितेकी छिन् ।
रोकाले छात्रा तर्फको १ हजार ५ सय मीटर र ३ हजार मीटरको दौड जितेकी हुन् । दौडमा उनको अगाडि कुनैपनि खेलाडी टिक्न सकेनन् । प्रतियोगितामा त्रिभूवन माबिकी सम्झना शर्मा द्वितिय र सिदार्थ शिक्षा सदनकी एन्जिला लिम्बु तृतिय भएका छन् ।
यस्तै, प्रतियोगिताको ३ हजार मीटर दौड प्रतियोगिताको छात्र तर्फको उपाधि सिगाना माबि तित्याङका रवि सुनारले जितेका छन् । सोमबार भएको खेलमा चिल्ड्रेन लाइफ बोर्डिङका गणेश केसी द्वितिय र त्रिभूवन माबिका रमित परियार तृतिय भएका छन् ।
त्यसअघि भएको १ हजार ५ सय मीटर दौड पनि छात्रातर्फ बिद्यामन्दिरकी ज्ञानदेवी रोका नै प्रथम भएकी थिइन् । त्रिभूवन माबिकै सम्झना पौडेलले द्वितिय र जनता–धन माबिकी अनुषा पौडेलले स्थानमा चित्त बुझाएका छन् ।
छात्र तर्फको १ हजार ५ सय मीटर दौडमा आदर्श बिद्यामन्दिरका अनुप जिसीले स्वर्ण, सिगाना माबि तित्याङका रवि बिकले रजत र गणेश माबिका हरि रोकाले कास्य पदक जितेको छन् । सोमबार एथलेटिक्स तर्फका एक सय, दुई सय र ४ सय मीटर लगायतका खेल सम्पन्न भएको आयोजक नगरपालिकाले जनाएको छ ।
