तस्बिर : राम बहादुर क्षेत्री
बागलुङ, ९ फागुन– बागलुङ नगरपालिका वडा नं. ६ स्थित सर्वशिद्धिधाम पञ्चकोटमा मंगलबारदेखी विश्वशान्ति सर्वसिद्धिधाम पञ्चकोट विराट महायज्ञ शुरु भएको छ । कोरोना महामारीका कारण ३ बर्षदेखी रोकिएको महायज्ञ यसपटक संचालन गरिएको हो ।
महायज्ञको उद्घाटन गर्दै बागलुङ नगरपालिकाका नगरप्रमुख बसन्त कुमार श्रेष्ठले धार्मिक गतिविधिमार्फत पर्यटकीय क्षेत्रको बिकास गर्नुपर्ने बताए । पञ्चकोटसंगै नगरक्षेत्रका धर्मिक तथा पर्यटकीय क्षेत्रको विकासका लागि सदैब नगरपालिकाको साथ रहने बताउँदै श्रेष्ठले भने, ‘समृद्धि र बिकासमा सबै एकजुट हुनुपर्छ ।’
सो अवसरमा बागलुङ नगरपालिका वडा नं. १४ का वडाध्यक्ष चक्रबहादुर केसी, वडा नंं ६का पुर्व वडाध्यक्ष खिमराज सापकोटा र पञ्चकोट बिकास समितिका पुर्व प्रतिनिधि अध्यक्ष नगेन्द्रराज शर्मा लगायतले शुभकामना मन्तव्य व्यक्त गरेका थिए ।
कार्यक्रम महायज्ञ संचालन समितिका अध्यक्ष केशव बहादुर कार्कीको अध्यक्षता, वडा नं. ६ का अध्यक्ष रुद्र बहादुर केसीको स्वागत र पञ्चकोट परिषदका सचिव नारायण आचार्यको संचालनमा कार्यक्रमको उद्घाटन सत्रको समापन भएको थियो । महायज्ञ १५ गते सम्पन्न गरिने पञ्चकोट बिकास समितिले जनाएको छ ।
महायज्ञको हरेक दिन बिहान ६ बजे महायज्ञस्थलमा पुजन प्रारम्भ, दिउँसो १२ बजेदेखी १ बजेसम्म हरिनाम संकृतन, साढे १ बजेदेखी बिशेषकथा प्रवचन र साँझ ६ बजेटबाट विष्णु सहस्रनाम पाठ हुने समितिका अध्यक्ष केशवबहादुर कार्कीले जानकारी दिए ।
पञ्चकोटमा हाल १ सय ३५ फिट अग्लो विश्वशान्ति गण्डकी कलश तथा ५ हजार ५ सय ५५ किलोग्रामको मुक्रिनाथ महाघण्ट निर्माण भईरहेको छ । यसबाहेक पञ्चमहालक्ष्मी मन्दिर, गौशाला, हनुमानको शालिकलगायतका धार्मिक संरचना निर्माण भईरहेका छन् ।
