म्याग्दी, २१ फागुन– सडक सुविधाबाट वञ्चित पर्वतको जलजला गाउँपालिकामा पर्ने बगरफाँटलाई म्याग्दीको बेनी बजारसँग जोड्न कालीगण्डकी नदीमा ‘बेलिब्रिज’ निर्माण थालिएको छ ।
कालीगण्डकी नदीको कटानपछि सडक सुविधाबाट वञ्चित बगरफाँटलाई जोड्न बेनी–जोमसोम–कोरला सडक आयोजनाले हिमालयन विल्डर्स बेनीसँग पाँच महिनाभित्र योजना सम्पन्न गर्नेगरी १ करोड ६० लाखमा बेलिब्रिज निर्माणको ठेक्का सम्झौता गरेको छ ।
बेनी–जोमसोम सडकअन्तर्गत पोखरेबगरस्थित कालीगण्डकी नदीमाथि निर्माण गरिएको तर हाल प्रयोगविहीन अवस्थामा रहेको बेलिब्रिजलाई कालीपुलमा जडान गर्नेगरी सम्झौता भएको आयोजना प्रमुख जगत प्रजापतिले जानकारी दिए ।
५४ मिटर लामो बेलिबिज्र पाँच महिनाभित्र निर्माण सम्पन्न गर्ने सम्झौता भएपनि तीन महिनाभित्र योजना सम्पन्न गर्ने लक्ष्यका साथ उपकरण र मजदुर परिचालन गरिएको निर्माण कम्पनीका सवओभरसियर सनम शाहीले दाबी गरे ।
यसअघि पुल निर्माणको माग गर्दै आन्दोलित बगरफाँटबासीले गत मंसिरको निर्वाचनमा कुनै पनि उम्मेदवारलाई मतदान नगर्ने घोषणा गरेपछि म्याग्दी र पर्वतका उम्मेदवारले बगरफाँट पुगेर पुल निर्माणका लागि पहल गर्ने प्रतिबद्धता जनाएका थिए ।
