बागलुङ, २१ फागुन– बडिगाड गाउँपालिकाको प्रशासनिक भवन निर्माण सम्पन्न भएको छ । स्थानीय तह स्थापनाको ६ वर्षमा बडिगाडले आफ्नै भवन निर्माण गर्न सफल भएको हो ।
पालिकाको केन्द्रमा पर्ने खार बजारमा प्रशासनिक भवन निर्माण गरिएको हो । एक वर्षअघि ताराखोला गाउँपालिकाले सुविधासम्पन्न प्रशासनिक भवन निर्माण गरेको थियो । १० पालिका रहेको बागलुङमा बडिगाड र ताराखोलाले प्रशासनिक भवन निर्माण गरेका छन् ।
गलकोट र जैमिनी नगरपालिकाको प्रशासनिक भवन निर्माण सुरु भएको छ भने ढोरपाटन नगरपालिका र काठेखोला गाउँपालिकाले भने जग्गाको टुंगो लगाउन सकेका छैनन् ।
बडिगाड गाउँपालिकाको ग्वालीचौरस्थित खार बजारमा स्थानीयले निःशुल्क ११ रोपनी जग्गा प्रदान गरेपछि दुई वर्षअघि प्रशासनिक भवन निर्माण थालिएको थियो । भवन हस्तान्तरणको तयारीमा रहेको गाउँपालिकाका अध्यक्ष गण्डकी थापा अधिकारीले जानकारी दिइन् ।
गाउँपालिकाले अहिले भाडाको घरबाट सेवा दिइरहेको छ । भवनमा लिफ्ट, अपाङ्गमैत्री, भूकम्प प्रतिरोधी लगायतका विशेषता छन् । तीनतले भवनबाट पालिकाले प्रदान गर्ने सेवा तथा आवश्यक शाखा सञ्चालनका लागि सहज हुने गाउँपालिकाले जनाएको छ ।
१८ महिनामा निर्माण सम्पन्न गर्नेगरी ५ करोड २२ लाखमा २०७७ साल जेठ १६ गते माउन्टेन कवीन्द्र जेभीसँग निर्माण सम्झौता भएको थियो । कोरोनाका कारण सम्झौताभन्दा एक वर्षपछि भवन निर्माण सम्पन्न भएको हो ।
