काठमाडौं, २३ फागुन– सहिद स्मारक ए डिभिजन लिग फुटबलमा दुई खेल हुँदैछन् । एन्फा कम्प्लेक्समा दुई नव प्रवेशी क्लब चर्च ब्वाइज युनाईटेड र एफसी खुमलटार भिड्ने छन् । चर्च र खुमलटारबीचको खेल दिउँसो साढे बजे सुरु हुनेछ ।
चर्च ब्वाइज लगातार दुई खेल जित्ने योजनामा रहेको छ । पहिलो खेलमा चर्चले पुलिस क्लबलाई हराएको थियो । खुमलटार पनि दोस्रो जितको खोजीमा रहेको छ । खुमलटारले पहिलो खेलमा फ्रेन्ड्सलाई हराएको थियो ।
यस्तै च्यासल मैदानमा फ्रेन्ड्स क्लब र थ्रीस्टार क्लबबीच प्रतिस्पर्धा हुनेछ । दुई टोलीबीचको खेल दिउँसो साढे २ बजे सुरु हुनेछ । यी दुई टोली पहिलो जितको खोजीमा छन् । फ्रेन्ड्सले पहिलो खेलमा खुमलटारसँग हार व्यहोरेको थियो भने थ्रीस्टार एपीएफ क्लबसँग पराजित भएको थियो ।
जारी यस सिजनको शीर्ष डिभिजनको लिग डबल राउण्ड रोबिनको आधारमा भइरहेको छ । यस पटकको लिगमा कुल १ सय ८२ खेल हुनेछ । यस पटकको लिग विजेताले ७५ लाख, दोस्रो टोलीले ५० लाख र तेस्रो हुने टोलीले २५ लाख रुपैयाँ पाउनेछन् ।
