म्याग्दी, २४ फागुन– जिल्लाको धवलागिरि गाउँपालिका वडा नं. ५ मल्कबाङमा स्वास्थ्यचौकी भवन निर्माण भएको छ । पाँच वर्षअघि निर्माण सुरु भएको स्वाथ्य चौकीको भवनले पूर्णता पाएसँगै जीर्ण भवनबाट स्वास्थ्य सेवा प्रवाह गर्नुपर्ने बाध्यता हटेको छ ।
वल्र्डवाइड मालीका भगवती जेभीले २०७४ मंसिरमा १८ महिनामा निर्माण सम्पन्न गर्नेगरी १ करोड ९० लाखमा स्वास्थ्यचौकी भवन निर्माण गर्ने ठेक्का सम्झौता गरेको थियो । निर्माणको ढिलासुस्ती, कोरोना, निर्माण सामग्री ढुवानीमा भएको समस्याले ढिला गरी भवन निर्माण भएको सघन सहरी तथा भवन निर्माण आयोजना बागलुङले जनाएको छ ।
भवन निर्माण सम्पन्न भएपछि स्वास्थ्यचौकी व्यवस्थापन समितिका अध्यक्षसमेत रहनुभएका वडाध्यक्ष अमर छन्त्याल र स्वास्थ्यचौकी प्रमुख जगदेवी छन्त्याललाई भवन हस्तान्तरण गरिएको इञ्जिनियर योगेन्द्र बास्ताकोटीले जानकारी दिए । उनका अनुसार, पहिरोले भवन जोखिममा परेपछि पर्खाल र ग्याबिन जाली लगाएर संरक्षणको काम गरिएको छ ।
अन्तिम पटक गत पुस मसान्तसम्मका लागि थप भएको समयसिमाभित्र निर्माण व्यवसायीले भवन निर्माण सम्पन्न गरेपछि कार्यालयको तर्फबाट जाँच गरिएको थियो । नवनिर्मित दुई तलाको १३ कोठे भवनमा बिरामीको उपचारका लागि शय्या, औषधि भण्डारण, कर्मचारी आवास, प्रशासन, तालिम हलका लागि छुट्टाछुट्टै कक्षको व्यवस्था छ ।
स्वास्थ्य चौकीबाट मल्कबाङसंगै मलम्पार र भेडीखाल्टाका करिब २ सय ५० घरधुरीले स्वास्थ्य उपचार सेवा लिँदै आएका छन् । भवन निर्माणले मल्कबाङको स्वास्थ्य सेवालाई थप व्यवस्थित र गुणस्तरीय बनाउन सहयोग पुग्ने वडाध्यक्ष अमर छन्त्यालले बताए ।
