बागलुङ, २५ फागुन– ज्योती पुञ्ज प्राथमिक विद्यालय बागलुङ नगरपालिका–७ को दुई कोठे पक्कि भवनको शिलान्यास गरिएको छ । बागलुङ नगरपालिकाका उपप्रमुख राजु खड्काले बुधबार भवनको शिलान्यास गरेका हुन् ।
भवन शिलान्यास गर्दै खड्काले शिक्षा क्षेत्रमा बनिरहेका पक्कि पूर्वाधारहरुले गुणस्तरीय र व्यवहारीक शिक्षालाई सहयोग गर्ने बताए । खड्काले तोकिएको समय भित्र भवन निर्माणको काम सक्न निर्माण समितिलाई आग्रह समेत गरे । उनले ज्योती पुञ्ज प्राथमिक विद्यालयलाई नमुना बनाउनका लागि आग्रह गरे ।
खड्काले विद्यालय भवन शिलान्यास समारोहमा आउने अतिथीका लागि तयार पारिएका खादा माला ११३ औं अन्तराट्रिय नारी दिवसका अवसरमा स्थानीय महिलाहरुलाई लगाएर सम्मान गरेका थिए । भवन आगामी असार मसान्तभित्रै निर्माण सम्पन्न हुने विद्यालय व्यवस्थापन समितिका अध्यक्ष महेन्द्र कुमार बिकले बताए ।
भवन निर्माणका लागि नेपाल सरकारले २५ लाख रुपैयाँ बिनियोजन गरेको थियो । बिद्यालयको अहिलेको अबस्था र पूर्वाधार तथा शैक्षीक गुणस्तर बिकासका लागि गर्नुपर्ने कामहरुको बिषयमा प्रधानाध्यापक रामप्रसाद शर्माले जानकारी गराएका थिए ।
