बागलुङ, २८ फागुन– बलबाहु नामले चिनिएका नेपाली कलाकार अरनिकोको जीवनीमा आधारित पुस्तकमाथि चर्चा गरिएको छ । शनिबार कुश्मा बजारस्थित शताब्दी घरमा अरनिको एशिया ः एक प्रस्तावना पुस्तकमा छलफल भएको हो ।
कलाकार अरनिकोको कलाकारिता र जीवनीबारे पर्वतको मोदी गाउँपालिकाका गणेशकुमार जिसीले पुस्तक लेखेका हुन् । उनले थप अनुसन्धान भैरहने बिषय भएकोले यो पुस्तक पुरा नभएको बताए । त्यसैले उनले यो पुस्तकको नाम नै एक प्रस्तावना लेखेको बताएका छन् ।
शनिबार आयोजित पुस्तक चर्चा कार्यक्रममा जिसीले नेपालका महान कलाकार भएर बिदेशी भूमिमा समेत चर्चा पाएका कलाकारबारे नेपालमा भने कुनै लेखोट समेत राख्न नसक्नु दुर्भाग्य भएको बताए । उनले बिषय उठान गरेको भन्दै अब धेरै खोजी गर्न सकिने बताए ।
कार्यक्रममा पर्वत साहित्य संगमका अध्यक्ष इन्द्रमान खत्रीले कलाकार अरनिकोले जानेको काष्ठकलाबाट चीनको बिकासमा योगदान पुगेको बताए । नेपालले अरनिकोको काष्ठकलाबाट के कति फाइदा पायो भन्ने इतिहास लिखित नभएको भन्दै नयाँ पुस्तालाई अरनिकोको योगदान पढाउनु पर्ने र जुनसुकै कलाको तथ्यांक राख्नुपर्ने खत्रीले धारणा राखे ।
बाह्रौ शताब्दीमा नेपालबाट अरनिको चीनमा गएका थिए । तत्कालिन राजाले नेपालका कलाकारहरुको प्रतिनिधित्व गर्दै ८० सदस्यीय कलाकार पठाउँदा अरनिकोले चीनमा पुगेर काष्ठकलाको ठूलो बिकास गरेको इतिहास छ । यद्यपी ती इतिहासहरु दस्तावेजमा कम भेटिन्छन् । कार्यक्रमका सहभागिले लेखकलाई जिज्ञाशा राख्दा जिसीले यस्तै सय जिज्ञाशा लिएर साहित्यकार सत्यमोहन जोशीकोमा पुगेपछि पुस्तक लेख्ने प्रेरणा आएको बताए ।
स्रष्टा गणेशकुमार जिसीको अध्यक्षतामा सम्पन्न पुस्तक चर्चा कार्यक्रममा पत्रकार महासंघ बागलुङका पूर्व अध्यक्ष मुकेशचन्द्र राजभण्डारीले पुस्तकबारे बिश्लेषण गरेका थिए । कुश्मा आर्ट परियोजनाका अध्यक्ष आर के गिरीको संचालनमा कार्यक्रम सम्पन्न भएको थियो ।
