बागलुङ, १२ चैत्र– बागलुङमा चैत्राष्टमी मेलाको आवसरमा तीन लाख पुरस्कार राशीको पुरुष भलिबल प्रतियोगिता हुने भएको छ ।
कालिका भगवति गुठी व्यवस्थापन समिति बागलुङले आयोजना गरेको चैत्राष्टमी मेलाको अवसरमा बिभिन्न कार्यक्रमसहित आयोजना गरिएको पुरुष भलिबल प्रतियोगितामा प्रथम हुनेले ३ लाख पुरस्कार प्राप्त गर्ने छ ।
प्रतियोगितामा द्धितीय हुनेले १ लाख ५० हजार, तृतीय हुनेले ७० हजार प्राप्त गर्ने गुठी व्यवस्थापन समितिका अध्यक्ष कुमार खड्काले बताए । सर्वोत्कृष्ट खेलाडीलाई १० हजार रुपैयाँ नगद प्रदान गरिने खड्काले जानकारी दिए । भलिबल प्रतियोगिता चैत १३ गते बिहान ८ बजेदेखि शुरु हुने छ ।
यसैगरी मेलाको अवसरमा आयोजना गरिने राष्ट्रिय लोकदोहारी गीत प्रतियोगिताको प्रथम पुरस्कार राशी १ लाख ५० हजार रुपैयाँ रहेको छ । द्धितीय हुनेले १ लाख रुपैयाँ, तृतीय हुनेले ७० हजार रुपैयाँ, सान्तवना हुनेले २० हजार रुपैयाँ पुरस्कार पाउने भएका छन् ।
सर्वोत्कृष्ट गायनलाई पाँच हजार नगद पुरस्कार प्रदान गरिने भएको छभने छेलो प्रतियोगितामा प्रथम हुनेले १५ हजार र द्धितीय हुनेले ७ हजार ५ सय पाउने भएका छन् ।
