बागलुङ, १३ चैत्र– धार्मिक तथा पर्यटकीय स्थल पञ्चकोट पुग्ने सडक स्तरोन्नतीको काममा ढिलासुस्ती भएको भन्दै स्थानीयले बागलुङ नगरपालिकाको ध्यानाकर्षण गराएका छन् ।
सडक निर्माणमा भैरहेको ढिलासुस्तीबिरुद्ध स्थानीयले सरोकार समिति नै गठन गरेर संघर्ष थालेका हुन् । बागलुङ नगरपालिका वडा नं. ६ भान्साको बलश्वारादेखि विचिन्द्रेसम्मको सडक स्तरोन्नतीको काममा ढिलासुस्ती भएको हो ।
आर्थिक बर्ष २०७८÷०७९ मा यो सडकको ८ सय ८ मिटर खण्ड स्तरोन्नती तथा कालोपत्रेका लागि ठेक्का स्म्झौता भएको थियो । २०७९ साल असार मसान्तसम्म काम सक्नेगरी ठेक्का सम्झौता गरेको जुगल विल्डर्स कम्पनीले तोकिएको समयमा सडकको काम नसकेको भन्दै स्थानीयले नगरपालिकाको ध्यानाकर्षण गराएका हुन् ।
नगरपालिकाकै संरक्षणमा निर्माण व्यवसायीले काम नगरेको सरोकार समितिका संयोजक गोविन्द प्रसाद शर्माले आरोप लगाए । समितिले उपप्रमुख राजु खड्का र निमित्त प्रमुख प्रशासकीय अधिकृत धनप्रसाद पोखरेललाई भेटेर ध्यानाकर्षण गराउँदै समयमै काम नसकिए थप आन्दोलिन हुने चेतावनी दिएको छ ।
सडकको बिषयमा ध्यानाकर्षण गराउन आएका स्थानीयलाई उपप्रमुख राजु खड्काले माग सम्बोधन गर्ने आश्वासन दिएका छन् । जुगलले नगरका अन्य आयोजनाहरुमा समेत काम गरिरहेकाले उक्त सडकको काम नसके अन्य आयोजनाहरुको बिषयमा समेत विचार गर्ने खड्काले बताए ।
नगरपालिकाले निर्माण कम्पनीका प्रतिनिधि प्रतिप गौतमलाई स्थानीय उपभोक्ता बीच राखेर समयमा काम सक्ने प्रतिबद्धता जनाउन लगाएको छ । गौतमले थप भएको असार मसान्तसम्म सडकको काम सकिने गौतमले प्रतिबद्धता जनाएका छन् ।
