तस्बिर : विजय राना
बागलुङ, १७ चैत्र– चैत्राष्टमी मेलाको अवसरमा आयोजित कालीका कप खुला भलिबल प्रतियोगिताको उपाधि नेपाल पुलिस क्लबले जितेको छ । उपाधिसँगै पुलिसले ३ लाख नगद पुरस्कार जितेको छ ।
शुक्रबार बिहान भएको खेलको पहिलो सेट हारेको पुलिस अन्ततः जितमा पुग्यो । पहिलो सेटमा पुलिसलाई गलकोट घुम्टे क्लबले हराएको थियो । दोश्रोमा पुलिस, तेस्रोमा घुम्टेले जितेपनि त्यसपछिका दुई खेल लगातार पुलिसले जितेर उपाधि हात पारेको हो ।
दोश्रो भएको घुम्टेले १ लाख ५० हजार नगद पुरस्कारमा चित्त बुझायो । तेस्रो पुरस्कार हिलसाइट निर्माण सेवा निलोले हात पारेको छ । हिलसाइटको दुइ टिमले तेस्रोको लागि प्रतिष्पर्धा गर्नु नपरेकोले तेस्रो र सान्त्वना बाँडेका थिए ।
चैतेदशै मेलाको अबसरमा आयोजित खुला भलिबल प्रतियोगितामा १४ टिमले भाग लिएका थिए । खेलमा पहिलो हुनेले ३ लाख नगदसहित मेडल र प्रमाणपत्र पाउने छन् । दोश्रो हुनेले १ लाख ५० हजार, तृतिय हुनेले ७० हजार र सान्त्वना हुनेले २० हजार नगद पुरस्कार पाउने खेल संयोजक अर्जुन खड्काले जानकारी दिए ।
