बागलुङ, १८ चैत्र– वडास्तरमै मेलमिलापकर्ताको उत्पादन गरी न्याय सम्पादनलाई सहज बनाउने उदेश्यले जनअधिकार संरक्षण मञ्च (पिपिआर) नेपालको संयोजन तथा बागलुङ नगरपालिकाको आयोजनामा शुक्रबारदेखी मेलमिलाप सम्बन्धी तालिमको शुरु भएको छ ।
तालिमको उद्घाटन गर्दै बागलुङ नगरपालिकाका नगरप्रमुख बसन्तकुमार श्रेष्ठले स्थानीय तहका समस्या समाधान गर्न मेलमिलाप केन्द्रले महत्वपुर्ण भुमिका निर्वाह गर्ने बताए ।
न्याय नपाएर पीडित भएका नागरिकलाई सहज रुपमा न्याय दिलाउन मेलमिलापकर्ताको भुमिका महत्वपुर्ण हुनेमा खड्काको जोड थियो ।
कार्यक्रममा नवआगन्तुक सहायक प्रमुख जिल्ला अधिकारी चित्रागंत बराल, जिल्ला अदालतका श्रेस्तेदार सुर्य भण्डारी र प्रहरी निरीक्षक राजाराम खड्काले बोलेका थिए ।
बागलुङ नगरपालिकाअन्र्तगतका ८ वटा वडामा मेलमिलाप केन्द्र स्थापना भईसकेको र अब ६ वटा केन्द्रमा स्थापना गर्ने तयारी रहेको बागलुङ नगरपालिकाका बरिष्ठ योजना तथा प्रशासकिय अधिकृत युक्तप्रसाद सुबेदीले जानकारी दिए । ८ दिनसम्म चल्ने तालिममा २५ जनाले सहभागिता जनाएका छन् ।
उद्घाटन कार्यक्रम नगरपालिकाका उपप्रमुख एवम् न्यायिक समितिका संयोजक राजु खड्काको अध्यक्षता, वडा नं. ११ का अध्यक्ष एवम् समितिका सदस्य ज्ञानेन्द्र गौतमको स्वागत र बरिष्ठ योजना तथा प्रशासकिय अधिकृत युक्तप्रसाद सुवेदीको सचालनमा सम्पन्न भएको थियो ।
