पर्वत, २४ चैत्र– सरकारले कुनैपनि विद्यार्थीलाई विद्यालयसम्म पुग्नका लागि आधा घण्टाभन्दा बढी पैदल हिँड्नु नपर्ने गरी विद्यालय बनाउन मापदण्ड तोकेको छ । तर, पर्वतको एक विकट गाउँका विद्यार्थी विद्यालयमा पढ्न दैनिक तीन घण्टाभन्दा बढी पैदल हिँड्न बाध्य छन् ।
पर्वतको महाशिला गाउँपालिका वडा नं. ४ पाखापानीका विद्यार्थी कक्षा ११ र १२ अध्ययन गर्न तीन घण्टाभन्दा बढी पैदल हिँडेर विद्यालय पुग्नुपर्ने बाध्यता छ । पाखापानीमा उच्च शिक्षा सञ्चालन भएको विद्यालय एउटा मात्र भएकाले अध्ययन गर्न टाढा जानुपरेको हो ।
लामतुनमा रहेको जनविकास मावि पुग्न पाखापानीका सिम्ले, भण्डारी थर, कोखे, चौडिल्ला बस्तीबाट बिहान दुई घण्टा उकालो हिँडेर विद्यालय पुग्नुपर्ने बाध्यता छ ।
एसइई सम्मको अध्ययन स्थानीय स्वधर्म र विश्वज्योति माविमा पढेपनि प्लस टु अध्ययनका लागि लामो बाटो हिँड्नु परेको कक्षा १२ मा अध्ययनरत राहुल भण्डारीको भनाई छ ।
अर्की विद्यार्थी शिवकला क्षेत्रीले बस्तीभन्दा विद्यालय टाढा हुँदा दैनिक सास्ती खेप्नुपरेको गुनासो गरिन् । विद्यालय भएको बस्ती लामतुनमा भन्दा पैदल हिँडेर जाने विद्यार्थीको संख्या उल्लेख्य रहेको वडाध्यक्ष पुरन मल्लल बताए ।
दैनिक तीन घण्टा भन्दा बढी पैदल हिँडेर जानुपर्ने बाध्यतामा ५० जनाभन्दा बढी विद्यार्थी रहेको विद्यालयले जनाएको छ । विद्यालयका प्रधानाध्यापक चक्रबहादुर क्षेत्रीले टाढाबाट आउने विद्यार्थी विद्यालय आएपछि मात्रै पठनपाठन शुरु गरिने जानकारी दिए ।
