पर्वत, ३ चैत्र–पर्वतको कुश्मा नगरपालिकाले बजार क्षेत्रको फोहर व्यवस्थापनबाट दैनिक १० हजार आम्दानी गर्न थालेको छ ।
बजार क्षेत्रको फोहर व्यवस्थापनमा समस्या झेल्दै आएको कुश्माले फोहर वर्गीकरण गरेर व्यवस्थापन सुरु गरेको तीन वर्ष पुगेको छ । नगरभित्रको फोहरलाई कुहिने र नकुहिने गरी व्यवस्थापन सुरु गरेको नगरले दुई वर्षदेखि फोहरबाट आम्दानी गर्न थालेको हो ।
कुश्मा नगरपालिका वडा नं. ४ छमर्केस्थित सडक किनारमा फोहर व्यवस्थापन गर्दै आएको नगरपालिकाले लक्ष्मीनारायण गुठी र चार व्यक्तिसँग १० वर्षका लागि ३२ रोपनी जग्गा भाडामा लिएर फोहर व्यवस्थापन सुरु गरेको नगरप्रमुख रामचन्द्र जोशीले बताए ।
उहाँका अनुसार, सामुदायिक स्रोत तथा वातावरणीय विकास केन्द्र (सेक्रेट नेपाल) सँगको साझेदारीमा पाँचवर्षे सम्झौता गरी फोहरको व्यवस्थापन भइरहेको छ ।
नगरपालिकाले कुहिने फोहरलाई खाडलमा थुपारेर कम्पोस्ट मलका रूपमा बिक्री गरेर आम्दानी लिन थालेको छ । कुहिनेभन्दा नकुहिने फोहरबाट राम्रो आम्दानी हुने थालेको सेक्रेट नेपालका कार्यक्रम संयोजक टीकाराम भुसालले जानकारी दिए ।
हाल सेक्रेट नेपालले फोहर वर्गीकरणमा मात्रै १२ कामदार खटाएको छ । व्यवस्थित वर्गीकरण सुरु भएपछि दैनिक १० हजारसम्म आम्दानी भइरहेको छ । आवश्यक मात्रामा जग्गा नहुँदा व्यवस्थापनमा केही समस्या भएको भुसालले बताए ।
