३० लाख खर्चेर ताकमकोतमा हनुमानको मूर्ति स्थापना

म्याग्दी, ११ बैशाख– धवलागिरि गाउँपालिका वडा नं. ७ मा स्थित ऐतिहासिक ताकमकोतमा करिब ३० लाखको लागतमा हनुमानको मूर्ति स्थापना गरिएको छ ।
धार्मिक पर्यटकीय हिसाबले प्रशस्त सम्भावना बोकेको ताकमकोतको आकर्षण बढाउन १२ फिट अग्लो हनुमानको मूर्ति राखिएको वडाध्यक्ष अशोक खत्रीले जानकारी दिए ।
मूर्ति स्थापनाका लागि धवलागिरि गाउँपालिकाले चालु आर्थिक वर्ष २०७९÷८० मा तीन लाख ५० हजार विनियोजन गरेको थियो । मूर्ति स्थापनाका लागि २९ लाख २७ हजार पाँच सय खर्च भएको र दाताबाट २४ लाख ४० हजार सहयोग जुटेको छ ।
अमेरिकामा रहनुभएका ताकमका रघुनाथ सुवेदीको अगुवाइमा मूर्ति स्थापनाका लागि आर्थिक सहयोग संकलन गरिएको थियो । सुवेदीका अनुसार दाताले घोषणा गरेको थप ७ लाख २६ हजार एक सय ११ प्राप्त हुन बाँकी छ ।
यस्तै, कोतमन्दिर परिसरमा ताकमका विकास र आकाश केसीको पहलमा खत्री परिवारले पितृ उद्धारका लागि प्रवेशद्धार निर्माण गरेको छ । स्वदेश तथा विदेशमा रहेका ताकम र आसपासका गाउँका बासिन्दाबाट तीन वर्षअघि ८० लाख चन्दा जुटाएर कोतघर र अन्नपूर्ण जगन्नाथ मन्दिरको पुनःनिर्माण गरिएको थियो ।
सोह्रौँ शताब्दीमा निर्मित ताकमकोत भूकम्पका कारण जीर्ण बनेको थियो । ताकमकोतको एकीकृत विकास गर्ने उद्देश्यले तयार पारिएको गुरुयोजनाअनुसार पहिलो कोतघर, अन्नपूर्ण–जगन्नाथ मन्दिर, सत्तल र सार्वजनिक शौचालय निर्माण भएको छ ।