बागलुङ, १५ बैशाख– बरेङ गाउँपालिका गाउँ कार्यपालिका नमूना विद्यालय कार्यक्रम सञ्चालन गर्ने भएको छ ।
गाउँ कार्यपालिकाले आर्थिक वर्ष २०७९÷०८० को शिक्षा तर्फको निति तथा योजना कार्यक्रम अनुसार सामुदायिक विद्यालयमध्ये उत्कृष्ट नतिजा हासिल गर्ने कुनै एक विद्यालयलाई गाउँपालिका स्तरीय नमूना विद्यालयका रुपमा स्थापना गर्न कार्यक्रम संचालन गर्ने भएको हो ।
नमूना विद्यालय छनौट तथा सञ्चालन कार्यविधि २०७९ कार्यपालिकाबाट स्वीकृत निमानुसार हुने शिक्षा शाखा प्रमुख सूर्यप्रसाद शर्माले जानकारी दिए । छनौटका लागि कक्षा ९ देखि कक्षा १२ सम्म सञ्चालित माध्यामिक विद्यालयसंग प्रस्तावना माग गरिएको शर्माले बताए ।
छनौट भएका विद्यालयहरुमा यस कार्यक्रम अन्तरगत परम्परागत सिपहरु जस्तै गुन्द्री बुन्ने, डोको नाङलो बुन्ने, पाककला जस्ता लोप हुन लागेका स्थानीय परम्परागत सिप विद्यार्थीलाई सिकाइने भएको छ ।
त्यस्तै प्राविधिक तथा व्यवसायिक सिप अन्तरगत कम्प्युटर, मोबाईल मर्मत, हेयर कटिङ, हाउस वायरिङ आदि सिपहरु सिकाइने गरी प्राविधिक शिक्षाको व्यवस्था गरिने शाखा प्रमुख शर्माले बताए ।
कार्यक्रमबाट विद्यार्थीहरुले सैद्धान्तिक शिक्षाको अतिरिक्त परम्परागत मौलिक सिपका साथै व्यावहारिक र प्राविधिक शिक्षा हासिल गर्ने अवसर प्राप्त हुने गाउँपालिका प्रमुख प्रशासकीय अधिकृत जितबहादुर रानाले बताए । यस कार्यक्रम अन्तरगत चालु आर्थिक वर्षमा १० लाख रुपैंया वजेट विनियोजन गरिएको रानाले जानकारी दिए ।
