बागलुङ, १३ जेठ– जिल्लाको बरेङ गाउँपालिकाका पशुचौपायामा पनि लम्पी स्कीन रोगको संक्रमण देखिएको छ । बरेङका ५ वटै वडाका पशुचौपायामा लम्पी स्कीनको संक्रमण देखा परेको हो ।
पालिकाका करिब ३० गाईगोरुमा लम्पी स्कीनको संक्रमण देखिएको छ । अहिलेसम्म संक्रमणका कारण एक गाई र एक गोरु मरेको पालिकाको पशुसेवा शाखाले जनाएको छ । भैसीमा भने यो संक्रमण नदेखिएको पशु सेवा शाखाका प्रमुख नारायण पौडेलले बताए । रोगग्रस्त क्षेत्रमा नियमित अनुगमन, उपचार लगायतका कार्य भइरहेको पौडेलले जानकारी दिए ।
लम्पी स्कीन रोगको संक्रमण देखिएका व्यावसायिक फार्ममा जैविक सुरक्षा अपनाउन, रोग लागेका पशुचौपायालाई चरनमा नलैजान तथा क्वरेन्टीनमा राखेर उपचार गर्न र रोगसंग मिल्दोजुल्दो लक्षण देखापरेमा गाउँपालिकाको पशु सेवा शाखामा सम्पर्क गर्न आग्रह गर्दै अन्य ठाउँमा पशु आयात तथा निर्यात नगर्न सुझाव दिएको छ ।
यसवर्ष गएको पुसदेखि नै पशुचौपायामा फाट्टफुट्ट रोगको संक्रमण देखिन थालेको थियो । लम्पी स्कीन रोग लागेका गाई÷भैँसीमा ज्वरो आउने र शरीरको विभिन्न भाग तथा भित्री तहमा गाँठागुठी देखिने, गाँठागुठीबाट पानी बग्ने र पाक्ने, पशु छटपटाउने, दुब्लाउँदै जाने, खुट्टा खोच्याउने, दूध उत्पादन घट्ने लगायत लक्षण देखिने पशु चिकित्सकको भनाई छ ।
