बागलुङ, १६ असार– अनौपचारिक क्षेत्र सेवा केन्द्र इन्सेकले सन् २०२४ को मानवअधिकार वर्ष पुस्तक प्रकशनका लागि अर्धवार्षिक समीक्षा सम्पन्न गरेको छ । शुक्रबार भएको घटना अध्ययन तथा समीक्षा कार्यक्रममा इन्सेक जिल्ला प्रतिनिधि सिर्जना पन्तले ४२ वटा मानवअधिकार उलंघनका घटना सार्वजनिक गरेकी थिइन् ।
तीमध्ये अधिकांस बलात्कारका घटना थिए । इन्सेकले ३० बर्षदेखि मानवअधिकार उलंघनका घटना समावेश भएको बर्ष पुस्तक सार्वजनिक गर्दै आएको छ । नेपालभरका घटना समावेश गर्नु पूर्व इन्सेकले पूर्व समीक्षा गर्ने गरेको छ । अर्धवार्षिक समीक्षामा बलात्कारका घटना १२ वटा, बलात्कार प्रयासका ३ वटा, अप्राकृतिक मैथुनको १ वटा र हत्याका ३ घटना सार्वजनिक भएका छन् । त्यस्तै बहुबिबाहका ३, घरेलु हिंसाका १९ र अन्य १ घटना पनि समावेश गरिएको हो ।
कार्यक्रममा सहभागिले मानवअधिकारको क्षेत्र फराकिलो बन्दै गएको भन्दै आम नागरिकको शिक्षा, स्वास्थ्य, खानेपानी र अन्य अधिकारका बिषय पनि समावेश गर्दै जानुपर्ने धारणा राखेका थिए । उनीहरुले नागरिकले सहज स्वास्थ्य सेवा पाउने कुरादेखि पढ्न अधिकार, बालबालिकाले राज्यका सेवा सुविधा निशर्त पाउनुपर्ने, जातीय भेदभावरहित समाज निर्माण गर्नुपर्ने बिषय समावेश गरिएको थियो ।
कार्यक्रममा सहायक प्रमुख जिल्ला अधिकारी चित्राङगत बरालले जातीय बिभेद जघन्य अपराध भित्र पर्ने भन्दै ती बिषय उजुरीको दायरामा आउनुपर्ने बताए । उक्त अबसरमा बरिष्ठ अधिवक्ता काजी गाउँले श्रेष्ठले मानवअधिकार रक्षाकालागि राज्यनै तयार नभएको बताए । उनले राज्यका निकायमा दिने सास्ती, अझैपनि अपांगमैत्री संरचना बन्न नसक्नु तथा जेष्ठ नागरिक मैत्री वातावरण नबन्नु जस्ता बिषयले पनि मानवअधिकार रक्षाको बिषयलाई गिज्याएको टिप्प्णी गरेका थिए ।
कार्यक्रममा अधिवक्ता राम शर्मा, प्रहरी नायव उपरिक्षक मदन केसी, पत्रकार महासंघका सचिव बिजय राना, सहकारी संघ बागलुुङकी अध्यक्ष हुमाकुमारी जिसी, अधिकारकर्मी साबित्री खड्का, मनोसामाजिककर्ता आशा घर्तीले बोलेका थिए ।
