बागलुङ, १८ असार– जिल्ला अदालत ललितपुरका कर्मचारीलाई कानून व्यवसायीले हातपात गरेको भन्दै न्याय क्षेत्रका कर्मचारी देशभर आन्दोलित भएका छन् ।
उनीहरुले हातपात गर्ने कानून व्यवसायीलाई कारवाही माग समेत गरेका छन् । गत असार १३ गते अदालतका नायब सुब्बा प्रेमिका तामाङलाई कानून व्यवसायी अमिर लामिछानेले हातपात गरेको कर्मचारीहरुले प्रकाशित गरेको बिज्ञप्तीमा उल्लेख छ ।
आइतबार बागलुङस्थित जिल्ला अदालत र उच्च अदालतका कर्मचारीले पनि काम रोकेर धर्ना बस्दा सेवा प्रभावित भएको छ । आइतबार बिहान १० बजेदेखि दिउँसो साँढे २ बजेसम्म कर्मचारीले अदालतको गेटमा धर्ना दिएका थिए । उक्त धर्नाका कारण अदालतको कामकारवाही ठप्प भएको हो । अदालतमा पेशी तोकिएको भएपनि कर्मचारी अभावमा कतिपय काम रोकिएको थियो । पेशी तोकिएका भएपनि हरेक काम कर्मचारीकै साथमा गर्नुपर्ने भएकोले सेवामा असर परेको हो ।
कर्मचारीले बिज्ञप्ती प्रकाशित गरेर कानून व्यवसायीले डिउटीमा रहेका कर्मचारीलाई सांघातिक आक्रमण गरेकोले कमल बन्द गरेर धर्नामा बस्नुपरेको बताएका छन् । अधिवक्ता लामिछानेले अदालतको फाँटमा पुगेर सक्कली मिसिल माग्दा बिबाद भएको थियो । ती कर्मचारीले निवेदन दिएपछि मात्र मिसिल हेर्न दिने भनेकी थिइन् । कानून व्यवसायीले आदेशमा के भएको हो सो मौखिक जानकारी दिएपनि हुने भन्दै गर्दा भनाभन भइ हात हालाहालसम्म पुगेको बताइएको छ ।
उक्त घटनापछि नासु तामाङले उच्च अदालत पाटनमा उजुरी दिएकी थिइन् । निवेदनपछि प्रहरीले ती कानून व्यवसायीलाई हिरासतमा राखेको छ । उनीबिरुद्द मुद्दा चलाउन तामाङले माग गरेकी छिन् । अदालतले उक्त घटनाको छानविनका लागि सिसिटिभी फुटेज झिकाउन माग गरेकोमा फुटेज भने गायब पारिएको कानून व्यवसायीले आरोप लगाएका छन् ।
घटनाको सत्यतथ्य छानविनपछि मात्र सही निष्कर्ष निस्कने भन्दै अन्य अदालतमा काम रोक्न नहुने उच्च अदालत बार एसोसिएसनका सचिव रमेशबहादुर खड्काले बताए । घटनाबारे कानून व्यवसायीका संगठनले पनि सत्यतथ्य छानविनको माग गरेका छन् । उच्च अदालत बार एसोसिएसन ललितपुरले अधिवक्ता लामिछानेलाई हिरासतबाट मुक्त गरी घटनाको सत्यतथ्य छानविनको माग गरेको छ ।
