बागलुङ, १९ साउन– लायन्स क्लब अफ बागलुङ पिस टाउनको आयोजनामा सिक्ने सिकाउने कार्यक्रम सम्पन्न भएको छ । उक्त क्लबले नयाँ क्लबको जन्म दिएपछि नयाँ सदस्यका लागि सिक्ने सिकाउने कार्यक्रम आयोजना गरेको हो ।
लायन्स क्लब भनेको के हो ? कसरी अन्तराष्ट्रिय तहदेखि अहिलेको अबस्थासम्म आइपुगेको हो भन्ने जानकारी दिंदै लायन्समा लागेका सदस्यले पुरा गर्नुपर्ने काम कर्तव्यबारे जानकारी दिनका लागि कार्यक्रम आयोजना गरिएको क्लबकी अध्यक्ष जमुना थापाले बताइन् ।
उक्त क्लबमै आबद्ध भएर तीन बर्षदेखि सक्रिय सदस्य मिना थापाको अध्यक्षतामा नया क्लब गठन भएको हो । लायन्स क्लब अफ बागलुङ गाजा हिलका सदस्यका लागि आयोजित कार्यक्रममा लियो क्लबका राष्ट्रिय सल्लाहकार नरेश कंडेलले सहजीकरण गरेका थिए ।
नेपालमा लायन्स क्लबहरुले शिक्षा, स्वास्थ्य र बाल अधिकार लगायतको क्षेत्रमा बढी काम गरेका छन् । रुबेला बिरुद्धको खोप समेत लायन्स क्लबहरुको लगानीमा गरिएको थियो । बागलुङमा मात्रै १३ वटा लायन्स क्लब भैसकेका छन् ।
कम्तिमा चारवटा क्लब भएपछि एउटा जोन हुने प्रावधान छ । नेपालमा लायन्स क्लबको ३२५ अन्तराष्ट्रिय मान्यता प्राप्त नम्बर छ । सिक्ने सिकाउने कार्यक्रममा लायन्स क्लबको जोन लिगर एड्भाइजर चन्द्र रेग्मी र जोन चियरपर्सन बद्री ढ्ुंगाना लगायतले नयाँ सदस्यका लागि जानकारी गराएका थिए ।
