म्याग्दी, २२ बैशाख– आगामी बैशाख ३० गते हुने स्थानीय तहको निर्वाचनका लागि म्याग्दीमा तयारी तीव्र भइरहेको छ । निर्वाचन कार्यालय, प्रशासन कार्यालय, सुरक्षा निकाय, मुख्य र निर्वाचन अधिकृतको कार्यालयले चुनावको तयारी तीव्र बनाएका हुन् ।
जिल्ला निर्वाचन अधिकारी भीमप्रसाद घिमिरेले निर्वाचनका लागि आवश्यक पर्ने जनशक्तिको खटनपटनको अन्तिम तयारी भएको जानकारी दिए । ‘चुनावमा खटाउने सम्भावित कर्मचारीको विवरण संकलन गरेर मुख्य निर्वाचन अधिकृतको कार्यालयलाई उपलब्ध गराएका छौँ’, घिमिरेले भने, ‘मुख्य निर्वाचन अधिकृतको कार्यालयले नियुक्ती दिएर चुनावमा खटाउने अन्तिम तयारी गरेको छ ।’
निर्वाचन कार्यालयले दुई हजार ३ सय ६७ जना निजामती कर्मचारी, स्थानीय तहका कर्मचारी, शिक्षक र स्वाथ्यकर्मीको विवरण पठाएको थियो । छ वटा स्थानीय तहका ४५ वडामा ७४ मतदानस्थल र १ सय १४ मतदान केन्द्र कायम गरिएको छ ।
यस्तै, १ सय १४ मतदान अधिकृत, १ सय १४ सहायक मतदान अधिकृत, २ सय १९ सहायक कर्मचारी र १ स १४ सहयोगी कर्मचारी गरी कूल ५ सय ६१ सुरक्षाकर्मीबाहेकका जनशक्ति नियुक्ति गरिने निर्वाचन अधिकारी घिमिरेले बताए ।
निर्वाचन आयोगबाट चुनावका लागि आवश्यक पर्ने सबै सामग्री जिल्लामा आइसकेको छ । ९६ हजार मतपत्र आएको मुख्य निर्वाचन अधिकृतको कार्यालयले जनाएको छ । जिल्ला सुरक्षा समितिले म्याग्दीका ७४ मतदानस्थलमध्ये १५ वटालाई अति संवेदनशील, ४९ लाई संवेदनशील र १० वटालाई सामान्य समूहमा राखेर योजना बनाएको प्रहरी नायब उपरीक्षक तिलक भारतीले बताए ।
निर्वाचन सुरक्षाका लागि म्याग्दीमा ६ सय १८ म्यादी प्रहरी भर्ना भएका छन् । मतदान केन्द्रमा २ सय ७७ सहित ३ सय ८० नेपाल प्रहरी खटिने छन् । सबै निर्वाचन अधिकृतको कार्यालयमा सुरक्षाका लागि सशस्त्र प्रहरीको टोली परिचालन गरिएको छभने सबै स्थानीय तहमा एक÷एक वटा घुम्ती टोली परिचालन गरेर गस्ती थालिएको छ ।
