बागलुङ, ७ जेठ– कालीका भगवती गुठीले आफ्नै प्रशासकीय भवन बनाउने भएको छ । शनिबार बागलुङ नगरपालिकाका प्रमुख बसन्तकुमार श्रेष्ठले भवनको शिलान्यास गरे ।
संघिय शहरी विकास मन्त्रालयको लगानीमा भवन बन्न लागेको गुठीका अध्यक्ष कुमार खड्काले जानकारी दिए । ९० लाखको लागत स्टिमेट भएपनि चालु बर्ष भुईँतला निर्माणका लागि ६१ लाख रुपैयाँमा ठेक्का सम्झौता भएपनि शनिबार शिलान्यास भएको हो ।
यो भवनमा प्रशासनिक काम तथा कालीका संग्राहलय समेत बनाउने गरी योजना राखिएको उनले जनकारी दिए । भवन शिलान्यास गर्दै नगरप्रमुख श्रेष्ठले बागलुङलाई पर्यटनको केन्द्र बनाउन कालीका भगवती मन्दिरको महत्वपूर्ण योगदान गरेको बताए । उनले कालीकाको आर्शिबादले बागलुङबासीमा शान्ति र समृद्धि समेत आउने बताए ।
गुठीले नगरप्रमुख श्रेष्ठ, उपप्रमुख राजु खड्कासहित जनप्रतिनिधिलाई पनि स्वागत तथा सम्मान गरेको थियो । उक्त अवसरमा समेत श्रेष्ठले पर्यटनबाट जिल्लाकै समृद्धि खोज्ने गरी योजना बनाइने बताए । उपप्रमुख खड्काले पनि पर्यटनको विकास नै पहिलो प्राथमिकतामा पर्ने भन्दै नगरपालिका र पर्यटन प्रवद्र्धन सँगै अगाडि बढ्ने बताए ।
गुठीका अध्यक्ष कुमार खड्काको अध्यक्षता, कार्यालय सचिव तारा शर्माको संचालन र सचिव भरत खड्काको स्वागतमा कार्यक्रम सम्पन्न भएको थियो । गुठीले नगरपालिका र कालीका मन्दिरको सम्बन्ध बिस्तार गर्ने, विकासमा योगदान गर्ने तथा पर्यटनको प्रमुख आधार बनाउने लक्षले परिचयात्मक कार्यक्रम राखेको खड्काले जानकारी दिए ।
