काठमाडौं, २० मंसिर– कतारमा जारी विश्वकप फुटबलमा ब्राजिल र क्रोएसिया क्वाटरफाइलमा प्रवेश गरेका छन् । सोमबार राती भएका खेलमा ब्राजिलले दक्षिण कोरियालाई ४–१ गोलले पराजित ग¥यो भने साविक उपविजेता क्रोएसियाले जापानलाई पेनाल्टी सुटआउटमा ३–१ गोल अन्तरले पराजित गरेको हो ।
स्टेडियम ९७४ मा भएको खेलमा ब्राजिललाई जित दिलाउनको लागि भिनिसियस जुनियर, नेयमार, रिचार्लिसन र लुकास पाक्वेटाले गोल गरे । दक्षिण कोरियाका पाइक सुएङ–होले एक गोल फर्काए ।
यस्तै, अल जानुब स्टेडियममा सोमबार राती जापानलाई पेनाल्टी सुटआउटमा ३–१ गोल अन्तरले हराउँदै क्रोएसिया अन्तिम आठमा पुगेको हो ।
प्रतिस्पर्धात्मक बनेको खेलको निर्धारित ९० मिनेट र थप गरिएको अतिरिक्त समय १–१ गोलको बराबरीमा सकिएपछि खेल पेनाल्टीमा गएको थियो । पेनाल्टीमा गोलकिपर डोमिनिक लिभाकोभिच चम्किएपछि क्रोएसियाले बाजी मार्यो । जितसंगै क्रोएसिया र ब्राजिलको भेट अब क्वाटरफाइनलमा हुनेछ ।
यस्तै, कतारमा जारी फिफा विश्वकप फुटबलमा आज मंगलबार राउण्ड अफ १६ अन्तर्गतका अन्तिम दुई खेलहरु हुँदैछन् ।
मंगलबार हुने पहिलो खेलमा मोरक्को र स्पेनबीच प्रतिस्पर्धा हुनेछ । एजुकेसन सिटी स्टेडियममा हुने मोरक्को र स्पेनबीचको खेल राती ८ः४५ बजे सुरु हुनेछ ।
अर्को खेलमा पोर्चुगल र स्विट्जरल्यान्डबीच प्रतिस्पर्धा हुनेछ । प्रि–क्वाटरफाइनलको अन्तिम खेलको रुपमा रहेको यस खेल राती १२ः४५ बजे सुरु हुनेछ । लुसिल स्टेडियममा आज दुबै टोली पोर्चुगल र स्विट्जरल्यान्ड जित निकाल्दै अन्तिम आठमा पुग्ने योजनामा रहेको छ ।
